Tuornu a ra scola

 

-Tuppi, tuppi! - chi n’è? – Mi cce vuliti

Assittatu ccu bbue supra ‘ssi vanchi

Vue ‘na mullica tutti quanti siti

Iu tiiegnu ‘a varva e ri capilli janchi;

ma me criscivi a cchista stessa scola

mo sù ttant’anni… ‘u tiempu cumu vola!

 

E nnummu ve criditi ca nun tiegnu

‘Nu pizzicu de sale a ru ciarviellu…

Si viecchiu tuornu ccà cce torn’e bbiegnu

Cà viatu chi torna qquatrariellu!

Vita cchiù bella e cchiù ffilice ‘un c’è

Dde quannu nne ‘mparamu l’abbeccè.

 

- Trasu? – Trasiti! – ‘e stesse cose care:

I vanchi, ‘e seggie, ‘u posticiellu miu!

Ve guardu ‘mpacce e bbidere me pare

Pped’ognunu de vue ‘n’amicu miu.

Tu certu si’…  Ttumasi. Tu… Gabbriele.

Tu… Ciccu. Tu… Rusariu. Tu… Michele.

Ma cumu? Cica nn’eramu pirduti,

tutti ‘sse banne banne e sparpagliati

chine ‘nzuffunnu e cchine mmuppa juti,

chine filici e cchine spurtunati,

e mmece simu ccà… bbielli, viniti,

ve spalancu ‘ste vrazza a cchiù ca siti.

 

Cchi ttiempi chiri nuastri chi su’ stati!

Quannu nisciemu ‘e ccà paria ‘nna fera.

Pariemu tanti diavoli ‘ncarnati,

pariemu tanti avanzi de galera,

pariemu ‘na nigliata de rinnuni.

Ah, ristati si forami guagliuni!

 

De juri dduve mo cc’è chiru mazzu,

Cc’era, a ri tiempi mie, ‘nu tavulinu.

Chiudu ‘nu puocu l’uocchj e llà bbicinu

Te viju ‘nu muscune, nu mustazzu

E ddue prunelle duci cumu mele:

è ru maestru miu! Ddò Mmanuele!

 

Guardati puru vue. Nu’ ru viditi?

E’ ‘nnu gigante e dduve nnue è bbinutu

Ppe’ nne purtare a ttutti ‘nu salutu

E ppe’ sse stare ‘nzieme a nnue ‘nu titi.

Vasamule, cumpagni, de luntanu,

cumu ‘na vota, tutti quanti ‘a manu.

‘A manu chi a ra facce ‘na carizza

Nn’ha ffatta, si nne l’amu mieritata;

a manu chi ‘na ricchja nn’ha ttirata

quannu nu’ ssimu juti de capizza;

‘a manu chi pigliau ttutte ‘ste manu

E ll’aste nne ‘mparaudi chianu chianu.

 

O mastru, quantu bbene nn’hai vulutu

E qquante cose bbelle nn’hai ‘mparatu!

Ppè ffigli a ttutti quanti nn’hai tinutu,

e nnue cumu ‘nu patre t’hamu amatu.

Restate sempre ccà. Nun ti nne jire

O t’arrucchiamu nummu pue fujire.

 

Ma propriu intra ‘stu mentre, oh cchi ppicatu!

Ppe’ mala sorta mia, me rispigliai.

‘Ssu paradisu me l’avia ssunnatu

E re lacrime all’uocchj me truvai.

Già me l’avia dde figurare: tu

Dicie ch’arrieti nu’ sse torna cchiù!