Al prof. Tommaso Pontano

  

Tumà, sai quantu pisu? Annu passatu

Era d’uttanta ruotula a ru gruossu;

mò sugnu nuvant’unu, purpa ed uossu,

ch’a pasta de Gragnanu m’ha ggiuvatu…

 

e ddire ca t’avia ppropriu juratu

de me manciare aruculi de fuossu

e dde vidire pennere mpicatu

a ri travi ‘e sazizze e ru mastruossu!

 

Ma pue, cchi bbue de mie? L’autra matina

Zerte suppere curme ‘e maccarruni

Me purtaru dde nuovu a ra ruina…

 

O razza cujjintara de manciuni,

chi gridamu: San Paulu! a ggargia chjna

sulu quannu nn’affruntanu i curzuni!...