Natale

 

‘A solita zampugna colarusa,

ccu ra nive, è scinnuta a ra marina;

e, mmo, de vientu e dde lamientu chjna,

sona ra ninna ad ogne pporta chiusa.

E ra santa Vijilia de Natale.

Sona, zampogna! sona ‘a Pasturale!

 

Sona! Pped’ogne nnota chi me porta,

Mo chianu chianu e mmo cchiù fforte ‘u vientu,

Intra ‘stu core miu turnare sientu

Tutta ‘na vita chi cridivi morta,

e mmi s’acqueta ‘n core ogni tturmientu

e ppassu supra ad ogne ccosa storta.

 

Mentre staju ccussì, tra dormebbiglia,

Trase ru suonu duce de ‘na ngaglia;

M’accarizza re ricchie, me rispiglia,

e mme porta, cussì, cumu ‘na paglia,

ppe’ forza de va vida quale ‘ncantu,

a ttiempi ‘e mo lontani ‘u ‘sse sa qquantu.

 

E, all’umbra de ‘na granne ciminera,

viju ‘n’ardente, caru fuocularu;

‘nu zuccu ‘ncarpinattu paru paru

arde ccumu ‘na cima de jacchera;

‘ntuornu cce su’: ‘nna vecchiarella accorta

e Nnannu e Ttata. Mamma, no! M’è morta!

 

A vecchiarella mia, fusu e ccunocchia,

fila ccumu suliadi ‘n quatraranza;

iu le zumpu cuntiantu are jinocchia,

Illa me cunta llesta ‘na rumanza…

e ra zampogna sona ‘n luntananza

e ri cumpagni mie le fau ra rocchia.

 

Sona zampugna! Portame luntanu,

a ri tiempi filici ‘e quatraranza;

a Nnanna chi filava cchianu chianu

‘ntramente me cuntava ‘nna romanza;

a ru zuccu chi ardia, ssempre cchiù cchiaru

sutt’a calastra de ‘nu fuocularu.